Buxoro istisno tariqasida Proliganing 1 ta uchrashuvini o‘z shahrida o‘tkazadi

Shu yilning 10-sentyabr kuni Liga mutaxassislari Buxoroga tashrif buyurib, viloyat futbol akademiyasi qoshida bunyod etilayotgan stadionda o‘rganish ishlarini olib borgandi. Xususan, Liga rahbariyati Buxoro viloyati hokimi Botir Zaripov bilan uchrashgandi.  

Buxoro klubi 2025-yilgi mavsumni Superligada o‘tkazishi mumkinligi hisobga olinib, Liga 16-sentyabr kuni viloyat hokimligi, shuningdek, O‘FA hamda Sport vazirligiga stadionni Superliga bellashuvlari uchun moslash yuzasidan o‘z xulosasini taqdim etgandi. 5-noyabr kuni Buxoro Superliga yo‘llanmasini naqd qildi. Klub kelasi mavsumdan boshlab uy uchrashuvlarini Buxoro shahrida o‘tkazishi Liga taklifida ko‘rsatilgan masalalar joriy yilning 10-dekabr sanasiga qadar hal etilishi lozim. 

Liga taklifida har bir talab batafsil ko‘rsatilgan. 17-18 noyabr kunlari mutaxassislar yana bir karra Buxoroda bo‘lib, hozirga qadar amalga oshirilgan ishlar bilan tanishdi. Shu asosda aytish mumkinki, ayni vaqtda Buxoro futbol akademiyasida Proliga uchrashuvini o‘tkazish imkoniyati mavjud. Biroq u hozircha Superliga talabiga javob bermaydi. 

Shundan kelib chiqib, Proliga 27-turidan o‘rin olgan Buxoro — Aral uchrashuvi 22-noyabr kuni Buxoro shahrida istisno tariqasida o‘tkaziladi. Mazkur bellashuv Buxoro klubining joriy mavsumdagi so‘nggi uy uchrashuvi hisoblanadi.

Ishonamizki, Buxoro futbol akademiyasi kelasi mavsumdan boshlab Superliga uchrashuvlarini qabul qilishi uchun barcha ish amalga oshiriladi.