Litsenziyalash jarayoni hal qiluvchi pallada: klublarimizda qanday kamchiliklar mavjud?

• 05.08.2021
• PFL

OFK talabiga asosan chempionatimiz ishtirokchi klublari har yili litsenziyalash jarayonidan o‘tkazib kelinadi. O‘tgan yildan e’tiboran O‘zPFL Pro liga klublarini ham mazkur jarayonga jalb etdi. Maqsad — klublarimiz infratuzilmasini bosqichma-bosqich yaxshilash hamda Pro liga va Coca-cola Superliga klublarini o‘rtasidagi katta tafovutni yo‘qotish.

Biz yil avvalida “Klublarni litsenziyalash reglamenti” ishlab chiqdik. Undagi ayrim mezonlar OFK belgilab bergan minimum talablardan kuchliroq bo‘lib, agar bizning klublar ushbu Reglamentda belgilangan milliy litsenziyalash talablarini to‘liq bajara olsa, OFK litsenziyasini qiyinchiliksiz qo‘lga kiritish mumkin bo‘ladi.

Hozirgacha klublarimiz dastlabki 4 ta mezon bo‘yicha hujjatlarni taqdim etdi. Mavjud kamchiliklar ichida eng asosiylaridan biri – stadionlar yoritish tizimining talab darajasida emasligi. Zero OFK 2021-yildan boshlab qit’a miqiyosidagi xalqaro uchrashuvlarni qabul qiluvchi stadionlar uchun talablarni qat’iylashtirdi. Endilikda Chempionlar ligasi guruh bosqichi o‘yinlari o‘tkaziladigan stadionlarda yorug‘lik darajasi 1800 lyuksdan kam bo‘lmasligi kerak (pley off uchun minimum talab – 1400 lyuks).

Ayni vaqtda Coca-Cola Superliga va Pro liga jamoalari uy o‘yinlarini o‘tkazadigan stadionlarda yoritish tizimi darajasi quyidagicha:

O‘zPFL talablari sabab so‘nggi 1 yil ichida qator klublar projektorni yaxshilab oldi. Misol uchun “Turon” talab darajasidagi projektorni yo‘q joydan barpo qildi, “Qizilqum”, “So‘g‘diyona”, “Paxtakor”, “Lokomotiv” klublari talab darajasiga etmay turgan projektorga qo‘shimcha yangi lampalar o‘rnatdi va yoritish tizimini yaxshilab oldi. Shu yilning 25-avgustiga qadar “Qo‘qon-1912” klubi stadionida ham minimal talablarga javob beradigan projektorlar nur sochishni boshlashi va’da qilinyapti.

Bu masalani paysalga solib kelayotgan klublar ham mavjud. Shundan kelib chiqib, Coca-cola Superliganing to‘rt klubiga yoz oyida uy uchrashuvlarini o‘tkazish taqiqi qo‘yildi. Ikkinchi bosqich 2022 yilgi mavsumdan boshlab amalda bo‘ladi va unda projektori talab darajasiga etkazilmagan yuqori divizion klublari nafaqat yoz, balki boshqa fasllarda ham uy uchrashuvlarini o‘tkazishdan mosuvo etiladi.  

Bundan tashqari joriy yil klublar uy uchrashuvlarini o‘tkazadigan stadionlarning xavfsizlik sertifikatiga ega bo‘lishi bo‘yicha O‘zPFL o‘z pozitsiyasida qattiq turdi. Natijada barcha klublar stadion xavfsizlik rejasini ishlab chiqdi. Uzoq yillar davomida aksariyat klublar uchun muammo bo‘lib kelgan xavfsizlik sertifikati endilikda hamma klublarimizda mavjud.

Shuningdek, O‘zPFL klublar akademiyasini tashkil etishda poydevor vazifasini o‘tovchi “Klubda yoshlar bilan ishlash tizimini rivojlantirish bo‘yicha dastur” ishlab chiqilishi va u akademiyalar bo‘yicha standartlarga mos kelishi masalasiga jiddiy ahamiyat qaratdi. Ayni holatda “Qo‘qon-1912”, “Qizilqum”, “So‘g‘diyona”, “Surxon”, “Aral samali”, “Xorazm” va “Yangiyer” klublarida bu borada kamchiliklar mavjud.

Navbatdagi masalada klub tizimida ish olib boruvchi murabbiylarning maxsus malaka diplomiga ega emasligini ko‘rsatishimiz mumkin. Bu yil mazkur muammo ancha kamaygandi, ammo to‘liq bartaraf bo‘lganicha yo‘q. Xususan, “Surxon”, “Qo‘qon-1912”, “Turon”, “Aral samali”, “Xorazm” va “Yangiyer” jamoalarida yoshlar tarkiblari bilan ishlaydigan mutaxassislarning hammasi ham “B” diplomiga ega emas. OFK talabiga ko‘ra, klubning yoshlar bilan ishlash tizimida kamida ikki nafar “B” murabbiylik litsenziyaga ega mutaxasislar ish olib borishi lozim. Shu shart bilan qolgan barcha murabbiylarga esa “C” diplomi bilan faoliyat olib borishga ruxsat etiladi.

Yoshlar bilan ishlash tizimiga oid yana bir muammo — akademiya direktori yoki bolalar bilan ishlash tizimiga mas’ul rahbar “A” murabbiylik diplomiga ega bo‘lishi shart. Ammo “Surxon”, “Dinamo”, “Aral samali”, “Xorazm” va “Yangier” jamoasida faoliyat olib borayotgan mutaxassislar bu talabga javob bermaydi.

Ma’lumot uchun, OFK belgilab bergan rejaga asosan litsenziyalash jarayoni aprel oyida start oldi va klublar iyul oyi so‘nggiga qadar sport, infratuzilma, ishchi-xodimlar, huquqiy mezonlar bo‘yicha, avgust oyida esa moliyaviy mezonlar bo‘yicha hujjatlarni taqdim etishi kerak. Hozirgacha klublarimiz dastlabki 4 ta mezon bo‘yicha hujjatlarni topshirdi. Ular tushunishi kerakki, aynan avgust oyi barcha kamchiliklarni bartaraf qilish uchun hal qiluvchi oydir.

Zero OFK va milliy litsenziya klublarning kelasi mavsumda xalqaro va ichki musobaqalarda ishtirok etishi masalasida ustuvor ahamiyat kasb etishini unutmaslik kerak.

Zohirjon Akramxonov, O‘zPFL Klublarni litsenziyalash va xalqaro aloqalarni rivojlantirish bo‘limi boshlig‘i 

O‘zbekiston kubogi. Pley-offning uch ishtirokchisi ma’lum

O‘zbekiston kubogi. 1-turni o‘tkazib yuboradigan rasmiy va futbolchilar

Birinchi liga. Yangi mavsum start oldi

Paxtakor-79 talabni bajarmadi va Liga jamoa o‘yiniga o‘z rasmiylarini yubormadi

O‘zbekiston kubogi. Buxoro yirik hisobda g‘alaba qozondi

O‘zbekiston Superkubogiga Bunyodkor stadioni mezbonlik qiladi