Бугун Намангандаги “Марказий” стадионида Coca Cola Ўзбекистон Кубоги финалидан олдин икки жамоа бош мураббийлари ва футболчилари иштирокида матбуот анжумани бўлиб ўтди. Дастлаб, финалда номинал мезбон ҳисобланган АГМК жамоаси бош мураббийи Миржалол Қосимов ҳамда жамоа дарвозабони Валижон Раҳимов матбуот анжуманида иштирок этишди.
“Биз бу стадионда “Навбаҳор” билан чемпионат доирасида ўйнаганимизда, бу ерга яна қайтиб келишни ва улар билан финалда ўйнашни ният қилган эдик”, - дейди Миржалол Қосимов. “Биз бу ерга етиб келдик, “Навбаҳор” финалга етиб кела олмаганидан эса афсусдаман, бу - футбол”.
“Рақиб салоҳияти ва кучи ҳақида гапириш шарт эмас. “Пахтакор” – чемпион, шунинг ўзи уларнинг қандай кучга эга эканини кўрсатади. Шундай бўлса ҳам, уларга қарши етарлича тайёргарли кўрдик. Биз ҳам финалга осонликча етиб келмадик. “Локомотив”, “Металлург” ва “Насаф” мамлакатимизнинг энг кучли жамоалари. Уларни мағлуб эта олдик. Шундай экан, финалга ҳақли тарзда етиб келдик. Финал бир ўйиндан иборат. Унда албатта имкониятимиз бўлади. Финалда хато қилмасликка ҳаракат қиламиз”.
Валижон Раҳимов: “Финалда стадионда кўпроқ мухлис бўлишига умид қиламан”
АГМК дарвозабони Валижон Раҳимов финалда стадион мухлислар билан тўлишига умид қилаётганини айтди: “Умид қиламанки, финалга кўпроқ мухлис ташриф буюради. Аввалги икки финалда мухлислар камроқ ташриф буюришган эди. Наманганда футболни жуда яхши кўришади. Умид қиламанки, эртага финалда кўпроқ мухлис келади. Биз финалга тасодифан чиқиб қолмадик. Бунгача кучли рақибларни мағлуб этдик. Эртага қизиқарли учрашув бўлиши кутилмоқда”, - дейди Раҳимов.
