O‘zbekiston Professional futbol ligasi pandemiya sharoitida futbol uchrashuvlarini barcha sanitariya qoidalariga rioya qilgan holda o‘tkazilishini ta’minlash, COVID-19 pandemiyasi davrida futbolchilar, murabbiylar va boshqa mutaxassislar sog‘lig‘i holatini nazorat qilish uchun malakali shifokorlardan iborat Komissiya tashkil etganidan xabaringiz bor.
Bugun ushbu Komissiya a’zolari tomonidan "Buxoro" va "Bunyodkor" jamoasi a’zolari Ig Gni aniqlash bo‘yicha testdan o‘tkazilmoqda. Bilasiz, 14 avgust kuni aynan mana shu ikki jamoa markazlashgan chempionatning ilk o‘yinida o‘zaro bahs yuritishadi. O‘tkazilgan test natijalari musbat chiqqan futbolchilar ularda antitana hosil bo‘lgani sababli qo‘shimcha tarzda funktsional holatni aniqlash bo‘yicha ko‘rikdan ham o‘tishmoqda.
Ig G natijasi manfiy chiqqan qolgan barcha vakillar qo‘shimcha PZR testini topshirishadi.
O‘zPFLning COVID-19 davri uchun komissiyasi Coca Cola Superliga klublari a’zolarining barchasini bugungidek testdan o‘tkazib, ularning sog‘lig‘i holatini nazorat qilib boradi.
