Ayollar futboli. “Bunyodkor-W” – ikki karra O‘zbekiston Superkubogi sohibi

Bugun Zomin shahrida ayollar futboli bo‘yicha VI O‘zbekiston Superkubogi bahsi bo‘lib o‘tdi. Unda o‘tgan mavsum O‘zbekiston kubogini qo‘lga kiritgan “Bunyodkor-W” jamoasi mamlakatning amaldagi chempioni “Sevinch”ga qarshi bahs olib bordi. Qayd etish joiz, ushbu o‘yin qayta ta’mirdan chiqarilgan “Zomin” stadionidagi dastlabki rasmiy uchrashuv bo‘ldi.

Bevosita bellashuv haqida to‘xtaladigan bo‘lsak, har ikkala jamoa a’zolari o‘yinni hujumkor tarzda boshlashdi. 7-daqiqada o‘tgan mavsum mamlakatimizning eng yaxshi ayol futbolchisi deb topilgan Umida Zoirova qanotdan uzatib berilgan to‘pni Maftuna Jonimqulova qo‘riqlayotgan darvozaga joylab qo‘yib, hisobni ochdi. Ammo, poytaxtliklarning xursandchiligi uzoqqa cho‘zilmadi. 11-daqiqada Nilufar Qudratova “qaldirg‘ochlar”ning himoyada yo‘l qo‘ygan pala-partish xatolaridan unumli foydalanib, muvozanatni tikladi.

Biroq ushbu goldan so‘ng “Bunyodkor-W” futbolchi qizlari o‘z o‘yinlarini kuchaytirishdi va birinchi bo‘lim so‘nggiga qadar Lyudmila Karachik ikkita to‘p kiritib, tanaffusga jamoasining 3:1 hisobidagi ustunlik bilan chiqib ketishini ta’minladi.

Ikkinchi taymda qarshiliklar o‘z o‘yinlarini kuchaytirishdi. Ko‘plab vaziyatlarda hujumchilarga aniqlik etishmagan bo‘lsa, toshkentliklar posboni Olga Qaxxorova ham bir qator vaziyatlarda jamoasi joniga oro kirdi. O‘z omadini qarshi hujumdan izlagan Elmira G‘ulomova shogirdlari o‘z maqsadlariga erishdi. 85-daqiqada darvozabon bilan yakkama-yakka vaziyatga chiqib borgan Mahliyo Sarikova “Sevinch” darvozasiga to‘rtinchi to‘pni kiritdi. Shu tariqa, “Bunyodkor-W” o‘z tarixida ikkinchi bor ayollar o‘rtasidagi O‘zbekiston Superkubogini qo‘lga kiritdi.

Ayollar futboli bo‘yicha VI O‘zbekiston Superkubogi

29-iyun, dushanba

BUNYoDKOR-W – SEVINCh 4:1 (3:1)

Zomin. “Zomin” markaziy stadioni

Hakamlar: Rahimbek Karimov, Mahmud Turdiev, Feruz Dostonov, Doston Rahmonov

Nazoratchi: Marat Ismoilov

Komissar: Nigora Abidova

Gollar: Umida Zoirova, 7 (1:0), Nilufar Qudratova, 11 (1:1), Lyudmila Karachik, 17 (2:1), Lyudmila Karachik, 36 (3:1), Mahliyo Sarikova, 85 (4:1)

“Bunyodkor”: Olga Qaxxorova (Zarina Saidova, 89), Zumrad Nazarova (Nozima Ergasheva, 67), Kamola Risqieva, Lyudmila Karachik, Mahliyo Sarikova, Saida Galimova, Marina Kosnikova, Umida Zoirova, Feruza Turdiboeva, Soliha Husniddinova, Luiza Sadirova

“Sevinch”: Maftuna Jonimqulova (Angelina Polyushkevich, 44), Laylo Tilovova, Feruza Boboxo‘jaeva, Laylo Shodieva, Maftuna Shoimova, Shoira Qulto‘raeva, Maftuna Panjieva, Diyora Erkinova (Fazilat Bahromova, 45, Shodiya Tosheva, 90), Malika Burxonova, Nilufar Qudratova.

Ogohlantirishlar: Maftuna Panjieva, 69, Shodiya Tosheva, 90.

Ayollar futbol bo‘yicha O‘zbekiston Superkubogi g‘oliblari

2015 – “Sevinch”

2016 – “Metallurg-W”

2017 – “Sevinch”

2018 – “Metallurg-W”

2019 – “Bunyodkor-W”

2020 – “Bunyodkor-W”.

mib
cola
apex
bmb