Qizilqum U21 3-turdan boshlab raqiblarini Karmanada qabul qiladi

Karmanadagi stadion e’tibordan chetda qolib ketayotgani, maydon mayda toshlar bilan to‘lganidan kelib chiqib, Liga Qizilqum U21 jamoasining ilk turdan o‘rin olgan Surxon U21’ga qarshi o‘yinini bekor qilgan va klubga texnik mag‘lubiyat yozgandi. 

O‘tgan vaqt davomida Navoiy klubi rahbariyati Karmanadagi maydonni yaxshilash uchun yetarlicha ish olib bordi. 18-mart kuni Liga mutaxassislari maydonni qayta monitoring qilish uchun Navoiyda bo‘ldi. O‘rganishlar natijasi shuni ko‘rsatdiki, maydon parvarishi yuzasidan ishlar boshlangan. U ortiqcha jismlardan to‘liq tozalangan, chim avvalgiga nisbatan o‘zini tiklagan. Ish shu yo‘sinda olib borilsa, aprel oyiga kelib maydon holati yanada yaxshiroq bo‘lishi kutilmoqda. 

Shuni inobatga olgan holda Liga maydonni U21 chempionati o‘yinlari uchun qabul qilib oldi. OKMK yoshlari 29-mart kuni mazkur stadionga tashrif buyuradi.

Ma’lumot uchun, Navoiydagi Yoshlar sport majmuasida katta hajmdagi ish davom etmoqda. Stadion aprel oyining ikkinchi yarmidan boshlab futbol uchrashuvlarini qabul qilishga tayyor bo‘lishi kutilmoqda. Shuningdek, Qizilqum futbol klubining U19, U21 hamda ayollar jamoalari o‘z uchrashuvlarini o‘tkazadigan qo‘shimcha futbol maydonlari barpo etish harakati boshlangan.