O‘zbekiston futzal federatsiyasi rasman faoliyat boshlashiga sanoqli soatlar qoldi

2017-yildan e’tiboran Liga futzal bo‘yicha Oliy liga, Birinchi liga, U18 chempionati, O‘zbekiston kubogi va Superkubogi musobaqalarini o‘tkazib keldi. 

Boisi, aynan 2017-yilda O‘zbekiston futzal assotsiatsiyasi tugatilib, mazkur sport turi bo‘yicha javobgarlikni O‘zbekiston futbol assotsiatsiyasi o‘z zimmasiga oldi, barcha ichki musobaqalarni o‘tkazish esa Liga chekiga tushdi. 

2020-yildan keyin Liga futzal musobaqalarini isloh qilishga o‘tdi. Birinchi navbatda uning geografiyasi kengaytirildi. Oliy liga o‘yinlariga nafaqat Toshkent, balki Andijon, Farg‘ona, Olmaliq, Jizzax, Qarshi, Buxoro, Xorazm shaharlari mezbonlik qila boshladi. Shuningdek, Oliy liga Sport-TV hamda Liganing YouTube sahifalari orqali translyatsiya qilina boshladi. 

Bugun — 25-dekabr kuni O‘zbekiston futzal federatsiyasi alohida tuzilma sifatida faoliyat boshlashi e’lon qilinadi. Bu qadam futzalni yangi bosqichga olib chiqish, terma jamoalar, klublar, ichki musobaqalar va futzalning boshqa sub’yektlarini bitta bayroq ostida birlashtirishda muhim sanaladi. Liga O‘zbekiston futbol assotsiatsiyasining mazkur qarorini qo‘llab-quvvatlaydi va ishonadiki, yangi yildan e’tiboran O‘zbekiston futzali yangi davrga qadam qo‘yadi. 

O‘zbekiston futzal federatsiyasini tashkil etish, uning rahbarlarini keng jamoatchilikka tanishtirish marosimi bugun Hilton mehmonxonasida bo‘lib o‘tadi. Soat 19:00 da start oladigan mazkur tadbirga OAV vakillari hamda futzalda faoliyat olib borayotgan barcha mutaxassislarni taklif etamiz.