Liga U19 chempionati pley-offiga barcha mutaxassislarni taklif etadi

21-oktyabr kuni U19 chempionatining mintaqaviy bosqichi o‘z yakuniga yetdi. Sharqiy mintaqada Olimpik, Bunyodkor, Paxtakor va Lokomotiv dastlabki to‘rt o‘rinni egallab, pley-off bosqichiga yo‘l oldi. Gʻarbiy mintaqada esa Nasaf, Buxoro, Sho‘rtan va Mash’al yoshlari muvaffaqiyatga erishdi. 

29-oktyabr kuni mazkur sakkiz klub pley-offning ¼ final bosqichida maydonga tushadi. Ular orasidan Bunyodkor — Sho‘rtan to‘qnashuviga Bunyodkor akademiyasi mezbonlik qilsa, pley-ofning qolgan barcha bellashuvlari Odil Ahmedov akademiyasiga qarashli futbol maydonida bo‘lib o‘tadi. 

U19 chempionatida ertangi kun yulduzlari to‘p surmoqda. Shundan kelib chiqib, musobaqani kuzatib borish uchun qator futbol agentlari o‘yinlarga tashrif buyurishni rejalashtirgan. Liga o‘z navbatida barcha klublar rasmiylarini mamlakatning eng kuchli yoshlari ishtirokidagi o‘yinlarga taklif qiladi.