Buxoro Proliga ikkinchi davrasini Do‘stlik stadionida o‘tkazadi

Buxoroda uy uchrashuvlarini o‘tkaza olmaydigan Buxoro klubi Proliga 2024-yilgi mavsumini Bunyodkor stadionida boshlagandi. Endilikda Superliga ishtirokchisi bo‘lgan Lokomotiv Superliganing qolgan uchrashuvlarini Bunyodkorda o‘tkazishi yuzasidan qaror (https://t.me/uzpfl/61348)qabul qilindi.

Liganing stadionlar bilan ishlash prinsipiga ko‘ra, ichki musobaqalar doirasida bir stadiondan 2 tadan ortiq futbol klubining foydalanishiga yo‘l qo‘yilmaydi. Shundan kelib chiqib, Buxoro Proliganing ikkinchi davrasini Bunyodkor stadionida o‘tkaza olmasligi mavsum boshidayoq ma’lum qilingandi.

Endilikda Buxoro O‘zbekiston futbol assotsiatsiyasi bilan kelishuvga erishdi hamda tashkilotga qarashli bo‘lgan Do‘stlik stadionida mavsumni yakunlashga qaror qildi. Qayd etish kerak, sobiq Buxoro SM maydoni Buxoro viloyati futbol akademiyasiga ko‘chirib o‘tkazilgan bo‘lib, ayni vaqtda majmuani ta’mirlash ishlari davom etmoqda.