Sergey Lushchan: Kelgusi mavsum jamoaga kim murabbiylik qilishi aniq emas

Superligada 25-tur o‘yinlari davom ettirildi. Navbahor jamoasi bu tur safarda Qizilqum bilan kuch sinashdi va 5:1 hisobida g‘alabaga erishdi. Bellashuvdan so‘ng jamoa bosh murabbiyi Sergey Lushchan matbuot anjumanida ishtirok etdi.

Sifatli, yaxshi o‘yin ko‘rdik. Natija va o‘yindan qoniqdim. Qo‘shimcha qilishga xojat yo‘q.

Hamrobekov uchrashuvni boshlang‘ich tarkibda boshlamaganining sababi nima?

U deyarli butun mavsumni to‘liq o‘tkazmoqda. Terma jamoa va klubda zaxirasiz o‘ynadi. Bahs oldidan uni maydonga tushirmoqchi emas edik. Ayrim muammolar sababli, 4 futbolchi maydonga tushmadi va undan biroz yordam berishni so‘ragan edik. Shunday hal bo‘ldi.

Kelasi mavsum jamoani yoshartirish maqsadi qo‘yilganmi?

Jamoa strategiyasi yoshlarga, mahalliy futbolchilarni jamoaga jalb etishga qaratilgan. Unga kim murabbiylik qilishi hozircha ma’lum emas. 

Navbahorning ko‘plab yetakchilari Neftchiga o‘tayotgani haqida mish-mishlar tarqaldi. Bu haqida fikringiz?

Balki, shundaydir. Bu masalada aniq bir gap ayta olmayman. Mavsum oxirida hammasi hal bo‘ladi. Barcha futbolchilar ko‘proq haq to‘laydigan jamoalarga o‘tadi. Bu ularning ishi. Bu borada biror narsa deya olmayman.